Natiq Cəfərli Rəşad Mahmudovu tənqid etdi

GÜNDƏM bölməsi

11:06 - 13 Noyabr 2023

 Natiq Cəfərli Rəşad Mahmudovu tənqid etdi

Azərbaycanda icbari tibbi sığorta haqlarının artırılması təklif edilib.

Millət vəkili Rəşad Mahmudov bildirib ki, icbari tibbi sığorta üçün yığımların artırılmasına ehtiyac var. Çünki Türkiyədə bu rəqəm 12 faizdir:

"Bizdə də yığımları ən azından 1 faiz artırmaqla səhiyyəmizin bir sıra problemlərini həll edə bilərik. Beynəlxalq səviyyədə imicimizə zərbə vuran bir məsələ var. Bu, bəzi nadir xəstəliklərin dövlət proqramına salınmamasıdır. Düzdür, ötən il kistoz fibroz salındı, lakin əlavə iki-üç xəstəlik var ki, onlar da dövlət proqramına salınmalıdır".

Yenipress.az xəbər verir ki, iqtisadçı ekspert Natiq Cəfərli Bakupost.az-a deyib ki, icbari tibbi sığorta yığımı faizlərini artırmaq yox, yığılmış vəsaitin daha səmərəli istifadəsi, eləcə də bu vəsait qarşılığında göstərilən tibbi xidmətin keyfiyyətinin yüksəldilməsi barədə düşünülməlidir:

“Bizdə çox vaxt keyfiyyət dəyişikliyi əvəzinə, qiymət artımı, verginin qaldırılması barədə düşünülür. Baha xidmətin yüksək də keyfiyyəti olmalıdır. Amma təəssüf ki, yoxdur”.

N.Cəfərlinin sözlərinə görə, bu gün vətəndaşların böyük əksəriyyəti icbari tibbi sığorta zərfinə daxil edilmiş tibbi xidmətlərdən bəhrələnə bilmirlər:

“Ümumiyyətlə, icbari tibbi sığorta zərfi çərçivəsində göstərilən tibbi xidmətlərdən xeyli sayda məlumatsız insan var. Məlumatı olanlar isə xidmət səviyyəsi aşağı olduğundan icbari tibbi sığorta haqqı ödəsə də, bəhrələnə bilmir".

Ekspert qeyd edib ki, bundan başqa, icbari tibbi sığorta çərçivəsində göstərilən tibbi xidmətlərin sahəsi çox dardır. Bu da vətəndaşlara əlavə problem yaradır:

"İnsanlar laborator xidmətlərdən tutmuş, diaqnostika və müalicəyə qədər keyfiyyətli tibbi xidmət üçün özəl tibb müəssisələrinə müraciət etməli olurlar. Çünki söhbət sağlamlıqdan gedir. Bir sıra cərrahiyyə əməliyyatları var ki, onları icbari tibbi sığorta qarşılamır. Ona görə də sadalanan problemləri həll etdikdən sonra icbari tibbi sığorta yığımlarını artırmaq olar".

N.Cəfərli bildirib ki, icbari tibbi sığorta yığımlarının artırılması vergilərin artırılması deməkdir. İstənilən icbari yığım vergi növüdür:

“Bu, faktiki olaraq vergilərin artırılmasıdır. Yığımla bağlı təklif hazıirki iqtisadi durumda məqsədəuyğun deyil".

Xəbər xətti


Digər xəbərlər