Zəlzələdə həlak olan azərbaycanlı tələbələr şəhiddir - İlahiyyatçı

TOPLUM bölməsi

14:13 - 17 Mart 2023

 Zəlzələdə həlak olan azərbaycanlı tələbələr şəhiddir - İlahiyyatçı

Xəbər verdiyimiz kimi, Türkiyədə baş vermiş zəlzələdə həlak olan azərbaycanlı tələbə Gündüz Nəzərzadənin başdaşı üzərində “şəhid” sözünün yazılması müzakirələrə səbəb olub.

Yenipress.az xəbər verir ki, bununla bağlı Kult.az-a açıqlama verən ilahiyyatçı Ağa Hacıbəyli bildirib ki, insanların kiməsə “şəhid” deməsi həmin şəxsin şəhid olduğu anlamına gəlmir:

“Peyğəmbərimiz (s.ə.s) bizə kimlərin şəhid sayıla biləcəyini öyrədib. Bəli, savaş meydanlarının haqqını verib, Haqq dərgahına gedənlərə şəhid deyirlər. Onlar axirətin həqiqətlərinə şahid olduqları üçün şəhid sayılırlar.

Peyğəmbərimiz (s.ə.s) şəhidliyin II, III, IV kateqoriyalarını da açıqlayır. Belə ki, əgər bir insan kütləvi xəstəliklər (taun kimi), su basqınlarında, övladını dünyaya gətirdiyi anda və bu kimi hallarda dünyasını dəyişərsə, bu zaman şəhidlik məqamı ilə taclandırılır. Bir tələbənin də xaricdə elm yolunda, Allah adına həlak olması da şəhidlik sayılır. Bizim cəmiyyətimizdə daha çox şəhidlik məktəbinin dərslərini savaş meydanlarında öyrəndiyimiz üçün hafizəmizdə belə qalıb. Ancaq dinə nəzər yetirdikdə görürük ki, şəhidlik anlayışı daha genişdir”.

İlahiyyatçı qeyd edib ki, şəhadət rütbəsi bir həyata, ömrə verilir:

“İnsan öz şirin canını Allaha qurban verdiyi zaman ona şəhidlik verilir. Ancaq islamda elmə verilən dəyər o qədər böyükdür ki, bu yola çıxmış insanın təbii fəlakətdən dolayı vəfat etməsinə də şəhidlik olaraq baxır. Bu baxımdan Gündüz Nəzərzadə və zəlzələzə ölən digər tələbələrimiz şəhid sayıla bilər”.

Xəbər xətti